Ўз тараққиётининг юқори чўққиларини бирма-бир забт этиб бораётган ахборот технологиялари оламида охирги пайтларда яратилаётган ихтироларнинг амалиётга татбиқ қилиниши жараёни анча тезлашиб кетди. Бу эса йирик банклар, компания ва корпорацияларни келгусида қандай йўл тутиш кераклиги ҳақида бош қотиришга ундамоқда. Негаки, ўзгаришларнинг жамият ҳаётига, саноат ва иқтисодиётга қай даражада таъсир кўрсатиши мумкинлигини билиш кейинги фолиятни тўғри йўлга қўйишда жуда муҳим аҳамиятга эга. Мутахассислар, тадқиқотчи олимлар, турли хил мониторинг ва статистика агентликлари бу борада аллақачон ўз қарашлари, фикр-мулоҳазаларини бидиришни бошлаб юборишган. Уларнинг башорати ҳақиқатга қанчалик яқин ёки йўқлигини қуйида келтирилган турли соҳага оид маълумотлардан билиб олишга уриниб кўрамиз.
Gartner тадқиқотчилари ўтган йилги натижалардан келиб чиқиб IT-саноати ва технологияларнинг ривожланиши бўйича 10 та асосий прогнозни эълон қилди. Консалтинг агентлигининг маълумотларига кўра, яқин келажакда бизни овозли интерфейслар, IoT (интернет билан боғлиқ буюмлар) ва чат-ботларнинг кенг тарқалиши, шунингдек, ёлғон ахборотлар авж олишининг рекорд даражага чиқиши ҳамда йирик технологик корпорацияларнинг ўз фаолиятини қайта кўриб чиқиши кутилмоқда.
Gartner консалтинг агентлиги Symposium/ITxpo форуми учун яқин 3-5 йилдаги 10 та асосий трендлар ҳисоботини тайёрлади. Тадқиқотчилар IT-саноатига келгусида сезиларли даражада таъсир кўрсатадиган тенденцияларни саралаб чиқишди. Улар қуйидагилар:
Ислоҳотлар даври бошланади
- 2021 йилга келиб нисбатан тараққий қилган корхоналар ўз ҳудудларида товарларни визуал ва овозли излаш хизматини жорий қила бошлайдилар. Компаниялар истеъмолчиларнинг қарашлари, хоҳиш ва истакларини яхшироқ тушунишни ўрганишади. Gartner тадқиқотчилари тахминига кўра, янгича услубнинг йўлга қўйилиши эвазига электрон тижорат майдони 30% га кенгаяди, шу билан бирга янги харидорларни жалб қилиш коэффициенти, мижозлар манфаатдорлиги ва бозордаги улуш ҳам ошади. 2021 йилда фақатгина овозли ёрдамчиларга бўлган талабнинг ўзи қарийб 3,5 млрд. долларлик бозорни вужудга келтиради.